مين عايز حاجة "حرشة"

 :))

ايه رأيكم في الباذنجان و الفلفل المخلل المرة ديه؟؟

الموضوع بسييييط جدا

نبدأ بأه و نقول بسم الله

:))

انا بعمله بالباذنجان الاسود علشان لونه مايغيرش 

بس أهم حاجة لما نشتري الباذنجان نجيبه صغنن كده و ابن ناس

 يعني مايزدش عن طول اصبع السبابة

و لو عرفتي تجيبي اصغر يبقى ياريت

علشان بيدي شكل جميل لما يكونوا صغننين و كمان يادوب قطمتين و يخلص

:)

هنقول مثلا نصف كيلو باذنجان اسود (عروس)

و كام واحدة فلفل (ممكن رومي و ممكن حامي)

مقادير الحشوة بالتقريب ::

و 2 طماطم بين الوسط و الكبير

4 فلفل أخضر رومي 

أقل من نصف ربطة كسبرة وزيها شبت (أحنا بس عايزين ريحة مش كمية كبيرة)

راس ثوم كبيييييرة مقشرة طبعا :))

نصف ملعقة صغيرة فلفل أسود

ملعقة صغيرة كمون 

ملعقة صغيرة ملح

ربع كوب أو أكثر قليل خل

نصف ملعقة صغيرة شطة (حسب الرغبة)

جدتي كانت بتحط كمان هريسة الشطة بس للأسف مش بعملها لاني الوحيدة في البيت اللي بحب الشطة 

الاول طبعا بشيل الحتى الخضراء اللي فوق الباذنجان و نقطع الجزء اللي تحتها بالسكين

و نقور الباذنجان بس مش زي بتاع المحشي

حاجة كده يادوب نشيل البذر بس

علشان انا بقرف من البذر :(

أنا كنت مصوراه لكم بس الصور راحت :((

المهم هي لفة بالمقور على اد البذر بس

و بعدين نحمر الباذنجان و الفلفل يادوب بس يستوي مش محتاج تحمير جامد

خدوا بالكم احنا هنقور الباذنجان بس الفلفل لسة ماعملناش فيه حاجة

و لما الفلفل و الباذنجان يبردوا نكون محضرين شوية ملح أبيض على جنب و نشق الباذنجان و الفلفل من الجنب شقة واحدة من فوق لتحت

و بالنسبة للفلفل هنشيل البذر بملعقة صغيرة

نحط طرف صابعنا في الملح و ندهن بيه الباذنجان و الفلفل من جوة

من جوة مش من برة ويادوب مسح خفيف

مش حنملحه طبعا و لكن الملح بيستخدم علشان يظهر طعم الحاجة

و نكون محضرين الخلطة اللي هنحشي بيها اللي هيا::

الثوم هنحطه في المطحنة مع الفلفل الاسود و الملح و الكمون و الشطة (البودر)

و نقطع الطماطم و الفلفل الاخضر مربعات وسط (لا كبيرة و لا صغيرة)

و شوية الخضرة اللي معانا (الكسبرة و الشبت)

و نحط عليها خليط الثوم

و عليهم الخل 

و نقلب بأه كويس هنشم الريحة التحفة بمجرد ما نحط الخل و نقلب

:))

و نحشي الفلفل و الباذنجان و نرصهم في علبة ثلاجة و نشيلهم في الثلاجة على الاقل ساعة قبل الاكل

انا عن نفسي بحشي و باكل في ساعاتها

لكن أقصد نسيبهم يختلطوا مع بعض و يتبلوا

لو عندك عزومة بأه ياريت تعمله من بليل و دوقي أحلي طعم بأه تاني يوم




بعتذر بشدددددة عن سوء حالة الصور

و في انتظار رأيكم
:))

بما اننا داخلين على موسم الأضاحي

نبدأ نجرب بأه الوصفات الخاصة باللحم الضانى و مشتقاته

هنعمل انهردة ال" طرب"

الطرب ده اساسي فيه المناديل الضاني

لو حتذبحوا في العيد وصي الجزار يطلعهولك على جنب
او اشتريه من الجزار عادي

و قطعيه زي ما بنقطع الكرنب (مستطيلات) و شيليه

و بنجيب لحمة مفرومة عادية و نحط عليها بصل مبشور مصفى من الماية بتاعته(نصفي كويييييس)
و نحط عليه ملح و فلفل و ممكن كمان كبابة صيني مطحونة بتدي طعم رائع

و نقلب اللحم المفروم مع كل الكلام ده
و نبدأ نحشي المناديل اللي جهزناها قبل كده و قطعناها

نصبع اللحم المفروم حاجة اكبر من شكل الكفتة حاجة بسيطة

 

و نرصها في صينية 

و ندخلها الفرن على درجة حرارة بين عالية و وسط
و لااااا تقلقي كل الدهون اللي في المناديل ديه هتسيييييح

نفتح الفرن و نصفي الدهون اللي نزلت ديه

و ندخلها تاني لحد ما كل الدهون تنزل خاااااالص وتاخد لون الشوي

و بعد كده ممكن نحط معاها فحمة مولعة علان تاخد ريحة الشواء

و ممكن نشويها اصلا من الاول و تبقى حفلة شوي
يعني تتحط في سيخ و على الفحم

و ديه طريقة تانية للطرب بتتبيلة مختلفة
من البرنامج المتميز "عباسيات"
http://www.youtube.com/watch?v=hNRNkCMyYko
:)
بألف هنا و شفا
:)

السلام عليكم و رحمة الله و بركاته

عملنا ايه انهردة؟؟

عملنا كيكة بالكريم كراميل

شوفتها في منتديات كتير بطرق مختلفة

حاولت استخلص الطريقة اللي ممكن تتصدق و تكون قريبة من الحقيقة

و جربتها و طلعت ناااااجحة و لله الحمد

المقادير:

للكريم كراميل:

2 باكو كريم كراميل

ملعقة كاكاو

و يتعمل الكريم كراميل زي ماهو مكتوب في طريقة العمل بالضبط

بس هيقولك تذاب محتويات الكيس في 2 كوب لبن
هنا بأه هنختلف و ندوبها في 1 و نص كوب لبن بس

يبقى هندوب كيسين الكراميل في 3 كوب لبن ساخن و معاهم ملعقة الكاكاو

و نحطهم على النار و قبل بدأ الغليان نطفي النار على طول

و نكون محضرين الصينية اللي هنعمل فيها

و نحط السكر المحروق في قعر الصينية

و نحط عليه الكراميل اللي عملناه

و نحطهم في الفريزير لحد ما نعمل باقي المقادير

مقادير الكيكة:

¾ كوب سكر

¼ كوب زيت ذرة

ندوبهم مع بعض لحد مايبقوا زي الكريمة

و نحط 2 بيضة و معاهم الفانيليا

و نضرب

نحط 1 و ¼ كوب دقيق + كيس و نصف بيكنج باودر+ملعقة صغيرة نشا

و نضرب

هنلاقي الخليط ثقل جدا

نحط ½ كوب لبن

و نضرب

كده عملنا الكيكة

نجيب الصينية اللي فيها الكريم كراميل يكون جمد شوية

و نحط عليه عجينة الكيكة

و نحط الصينية في حمام مائي و في الفرن

لمدة ساعة تقريبا  على درجة حرارة 200

بس نكون محميين الفرن من قبلها

هي بتداخد من ساعة لساعة و ثلث حسب الفرن

ابتداءً من ساعة ممكن تلقي عليها نظرة و تحطي طرف السكينة لو طلعت نظيفة يبقى خلاص

و تطلعيها من الفرن على الفريزر عدل

بعد ساعة  ولا ساعة و نص ابقي بصي عليها

و اقلبيها في طبق كبير

على فكرة ممكن تخلي الكيكة اللي بالشوكولاتة و الكريم كراميل بالفانيليا عادي
عكس ما انا عملت يعني

ساعتها مش هنحط في الكريم كراميل الكاكاو و هنشيل من مقدار الدقيق ملعقة و نحط مكانها ملعقة كاكاو

و بالهنا و الشفا

السلام عليكم و رحمة الله و بركاته

عاملين انهردة الحلو

**تشييييز كييييك بجيلي الفراولة**

طبعا ممكن بنفس الطريقة نحط التوبنج أي حاجة احنا عايزينها

هقولكم ازاي في الاخر

أهمممممم حاجة في التشيز كيك الصينية تكون بقاعدة متحركة
علشان تعرفي تغرفيها و تقدميها من غير ماتبوظ منك

المهم المقادير

لقاعدة البسكوت:

1 و نص باكيت بسكويت
(انا جيبت داناش الاخضر علشان ريحته و طعمه حلوين)

نص كوب زبدة

نطحن البسكوت مع الزبدة
و نرصها طبقة في قعر الصينية و نضغط عليها خالص و نساويها تماما بإيدينا

و نحضر خلطة الجبنة اللي بتبقى في النص:

4 مثلثات جبن لافاشكيري

(و ممكن كيري أو أي جبن مطبوخ تاني طري)

ملعقة كبيرة دقيق

(اللي بناكل بيها مش الغرف)

2 كوب الا ربع لبن

(يعني كوب و ثلاث أرباع)

نصف كوب سكر

بيضة

كيس فانيليا

(طبعا المقادير ممكن تتضاعف زي مانتوا عايزين)

على حسب الحجم اللي انتوا عايزينه

و كلللل ده يتضرب مع بعضه في الخلاط و يتحط على طبقة البسكويت

و يتحط الكلام ده في فرن متوسط الحرارة لمدة نص ساعة

و بعد ما يخرج نسيبه يبرد

على ما الصينية تخرج من الفرن نجهز الجيلي

مكتوب على باكيت الجيلي يذوب في 2 كوب ماء مغلي

**نصيحة**

علشان الجيلي يكون متماسك و لون أغمق واضح

تذوبي الجيلي في كوب و نصف ماء فقط

و تحليه ب3 ملاعق صغيرين سكر

و لما الجيلي يبرد و الصينية كمان تبرد

نحط الجيلي على خليط الجبنة

و ندخلهم الفريزر علشان يمسك بسرعة

و قبل ما يتجمد نحطه في الثلاجة عادي بس تحت الفريزر مباشرة

في حركة خدعة بعملها علشان الفاكهة تكون جوة الجيلي و ماتذبلش أو لونها يتغير

اشيل شوية جيلي على جنب ما أحطهوش كله على الجبنة و احطه في الثلاجة علشان يسقع بس مش يتجمد

و احط نصف مقدار الجيلي على خليط الجبنة و ادخله الفريز

و قرب ما يتجمد أرص عليه الفاكهة

(تكون جامدة مش مستوية)

و اغرزها في الجيلي اللي بدأ يتجمد

و احط عليه باقي الجيلي السائل الساقع و احطهم تاني في الفريزر

اول ما الطبقة التانية تبدأ تتجمد انزله في الثلاجة عادي

و يطلع شكلها زي الصورة ديه

انا عملت جيلي فراولة

فزينته بالفراولة و ممكن ازينه بالموز و ممكن اعمل تشكيلة حلوة باللون الاحمر (الفراولة) و الاصفر (الموز) و الاخضر (الكيوي)

اهم حاجة لو هتزينيه بفاكهة تمسحي وش الفاكهة بالفرشاة بجيلي من نفس لون الفاكهة و ممكن جيلي شفاف

ممكن طبعا ماتحطيش فواكه و تعملي وردة صغننة بالكريم شانتيه على كل مثلث تقدميه

و ممكن بلااااش جيلي خالص و تحطي بداله مربى أي نوع بتحبيه

و ممكن تحطي التوبنج كراميل

ممكن شوكولاتة

زيييي مانتي عايزة

على حسب المتاح عندك

علشان تعملي كراميل زي اللي جوة شوكولاتة مندولين و لا جلاكسي و الحاجات اللي تفتح النفس ديه

في طريقة تخليه نفس الشكل و اللون و القوام

تجيبي علبة لبن مكثف

و تحطيها في حلة فيها ماية بتغلي

و سيبيها لمدة ساعة و نص

و بعد كده افتحيها و اتفرجي و دوقي و ذوووبي

ممكن طبعا تحطي مربي توت و لا فراولة و لا مشمش زي ماتحبوا

المهم انتوا بتحبوا ايه؟؟

:)

قولولي رأيكم بأه

و اخبارها ايييه معاكم

مستنية رأيكم

هحطلكم كام فكرة للتقديم

عيشوا يالا

:)

السلام عليكم و رحمة الله و بركاته

رجعالكم انهردة بأكلة ممكن تكون معروفة بس أنا عن نفسي
أول مرة أعملها

مكرونة عليها فراخ بالصوص الأبيض و المشروم

أكلة خفيفة
سريعة
صيفي
و طعمها جميل

بتسلقي المكرونة عااادي جدا و تركنيها

نكون محضرين صدور الدجاج و متبلينها بالبصل المبشور و الملح و الفلفل

و نقطع صدور الدجاج شرائح

نجيب طاسة غويطة شوية 

و نحط فها زيت يادوب يغطي القعر 

و بعد ما الزيت يسخن نحط الفراخ المقطعة المتبلة و نقلب و احنا و اقفين لحد ما تستوي الفراخ

و نحط عليهم كمية المشروم اللي عايزينها و نفضل نقلب لحد ما الماية تروح منها خالص
و نحط ملعقة كبيرة دقيق و نقلب كويس بسرعة

و ماتخافوش مش هيكلكع و لا حاجة لان مافيش ماية موجودة في الطاسة

نقلب حاجة بسيطة لحد ما الدقيق ياخد لون البيج

و بعدين نحط كوب لبن و نقلب بسرعة
هيمسك بسرعة

نقفل و نحط كوباية ماية و نقلب و النار مقفولة

بس كده

الصوص جاهز يا فندم

ممكن نحط رشة فلفل اسود مطحون و خلاص

و نغرف المكرونة و نحط عليها الصوص من فوق

ممكن كنوع من الديكور نحط رشة كسبرة خضرا مفرومة 

أو ريحان أخضر مفروم

ممكن طبعا نحط الصوص بالفراخ على المكرونة و نقلبها و نقدمها كده

بس لما يكون الصوص بالفراخ من فوق بيكون الشكل أشيك 

المهم أنتوا بتحبوا ايه

و بألف هنا و شفا

ماتنسوش رأيكم في الكومنتات
مهم جدا رأيكم

اشوفكم على خييير المرة الجاية مع التشيز كيك بالفراولة

السلام عليكم و رحمة الله و بركاته

هلا و غلا للجميع

بما ان في خبر سعيد و الناس فرحانه

ربنا يجعل فرحتنا ديه أول قطرة في سيل النصر و الفرح لينا كلنا يارب

فقلت ننتهز الفرصة ديه و نحط حاجة حلوة الناس تحلي بيها

ايه رأيكم انهردة في

**بلح الشام**

اه احنا مش في رمضان

بس الحدث يستاهل برضه اننا نعمل حاجة خاصة برمضان

نبدأ بأه على طول من غير رغي كتير

::المقادير::

1كوب ماء

1و نص كوب دقيق

8 ملاعق زيت

( ملاعق كبيرة اللي بناكل بيها مش الكبشة)

3بيضات

1بطاطس وسط مسلوقة و مهروسة

(و هي ساخنة نهرسها علشان مايكونش فيها كلاكيع)

1فانيليا

رشة ملح صغننة على الدقيق

شربات تقيل

(بس مش ثقيل اوي علشان بلح الشام مايتفتفتش)

ندخل على الطريقة بأه

نحط الماية على النار و نحط عليها ال8ملاعق زيت اللي قولنا عليها

أول ما الماية تغلي نحط الدقيق و نطفي النار و نقلب كويس أوي و بسرعة علشان الدقيق كله يختفي و معاهم رشة الملح

لحد ما يتكون عندنا كورة عجين

نفرد الكورة و نقلب معاها البطاطس المهروسة اللي محضرينها و نقلب كويس لحد ما الاتنين يتجانسوا تماما

و لما العجين يكون دافي نحط معاهم البيض واحدة واحدة

نحط واحدة و نقعد نقلب لحد ما تتجانس و لما العجين تنشف تاني تحط التانية و هكذا

مع اخر بيضة نحط الفانيليا

و نقلب كويس لحد ما يوصل لكده

و نجهز الاداة بتاعتنا

القمع

زي ده كده

و يكون الفتحة بتاعته كبيرة مش صغننة

لو مش عندك قمع مافيش مشاكل خاااالص

ممكن كيس حلوانى

أو المسدس ده اللي بيعملوا بيه أشكال

كله ماشي

اهم حاجة الشكل اللي هيطلع يكون شكل بلح الشام اللي احنا عارفينه

نجهز الطاسة اللي هنحمر فيها

عايزينها واسعة و غويطة الي حد ما

علشان تاخد كمية كبيرة و تتحمر كويس

و نلبس الجوانتي بتاعنا و نحط العجين في القمع و نبدأ نزل القطع بتاعتنا في الزيت

(اهم حاجة ان الزيت يكون باااااارد)

على الاقل تقدري تحطي صباعك فيه

ده سر الصنعة

:)

 

و تحطي القطع بتاعتك طويلة او قصيرة او وسط

زي ماتحبي

أهم حاجة تسيبي مسافات معقولة بين القطع علشان نعمل حساب إن القطع هيتضاعف حجمها

و لما تاخد اللون الذهبي اللي احنا عارفينه نشيلها من الزيت و نطفي النار

و نحطها في مصفة لحد ما نشيل كل القطع

و بعد كده نحطها في الشربات

و نحطها في مصفة تانية علشان تصفي الشربات

و بعد كده نرصها في طبق التقديم بتاعنا

خدوا بالكم انا قلت نطفي النار

علشان الزيت يلحق يبرد شوي على ما اعمل اللي قلنا عليه

و بعد ما الزيت يكون برد شوية نعمل الليلة ديه تاني من الاول

و هكذا لحد ما العجين يخلص

و بالهنا و الشفا

:)

السلام عليكم و رحمة الله و بركاته

نبدأها ببسم الله

و نعمل مع بعض حاجة خفيفة كده

بس طعمها رااااائع

ممكن جدا تتاكل لوحدها

**سلطة فراخ**

مقاديرها سهلة و بسيطة جدا

3 او 4 قطع فراخ

(بانيه)

(مقطع شرائح لا طويلة و لا قصيرة و لا تخينة و لا رقيقة)

1خس كابوتش

1/8 زيتون مخلي حلقات

علبة (صغيرة) ذرة حلوة

3فلفل ألوان

(أحمر/اصفر/أخضر)
(على فكرة انا نسيت احط الفلفل الالوان في الطبق اللي في الصورة بس فعلا بيعمل شغل جاامد)








ملعقة كبيرة صوص صويا

ملعقة كبيرة عسل نحل

2ملعقة كبيرة مايونيز

(ممكن 3 لو الموضوع احتاج)

هنقطع الفراخ شرائح زي ما اتفقنا و نبشر معها بصلاية وسط و ملح و فلفل و على النار نعصجهم

و مانغطيهاش

يادوب الفراخ تدخل في السوا

مش عايزينها مستوية اوي علشان ماتتهريش مننا

و نركن الفراخ المستوية

نحطها في الثلاجة لحد ما نحضر باقي المقادير

هنقطه الخس شرائح

و الفلفل الالوان مكعبات وسط لا صغيرة و لا كبيرة

و نحطهم على بعض

و نحط عليهم الذرة الحلوة و الزيتون الحلقات

و نروح للفراخ ونحط عليها العسل و الصويا صوص

(لااااااااا تقلقوا مافيش اي طعم للعسل هيبان)

و نقلب الفراخ على السلطة اللي جهزناها

و نحط عليهم المايونيز

و نقلب كويس اوي علشان كل الطعم يتوزع

و بالهنا و الشفا

بجد بجد

راااائعة

على فكرة الكمية ديه كتييييييير جدا

يعني ممكن تعملوها في عزومة

يالا قولولي رأيكم ايييه